青頭仔：小弟早排識咗個女仔，拖咗手仔一段時間，大家決定住埋一齊。我哋喺拍拖時最多只係錫錫，從未發生過關係。家陣住埋一齊，加上呢個女仔係我初戀，梗係有咁盡做咁盡啦！點知每次曳曳完後，佢都倒頭就瞓，想傾句偈都冇，其實係咪個個女仔都係咁嘅呢？
細路哥：你係咪經常到半夜，先至撩人哋開波呀？如果你返咗成日工，放工返到屋企，梗係上床瞓覺啦！點知瞓到半路又畀你搞到興合合，好唔容易先至令你打個冷震，呢個時候仲唔瞓咩？如果唔想女友完事後就瞓嘅話，一於等到天光臨返工前先至曳曳，佢咪唔會倒頭就瞓囉！
邪神：計我話，應該係你前戲做得唔夠呢？因為仁兄你話自己係初戀，假設你以前都冇試過曳曳，理論上前戲未必會留意到。就係因為你前戲唔夠，因而令到女友未夠投入。雖然你打咗個冷震，但係女友始終未入局，於是當你洩慾後，佢咪繼續瞓覺，唔通仲等你話佢知，頭先你覺得有幾疏肝咩？
大可樂：其實我覺得你最好都係問番你女友，事關呢啲始終都係你哋兩個嘅問題。因為性生活出現咁嘅情況，一定係同你哋之間有關。為咗可以令性生活變得圓滿，你都係問過你女友啦！如果問我嘅話，我就覺得有可能，佢根本冇諗過要同你發生關係，只係諗住住埋，點知就咁畀你食咗，咁咪嬲囉！