最近撞到損友和仔，問佢呢期去邊度玩多？佢話最近改咗去內地做龍友。龍友即係幾條友仔夾份租個網模出嚟影相，扮晒攝影大師嘅玩意，我話呢啲齋影相嘅玩意，你個大滾友都有興趣？佢話出嚟玩得多明買明賣，家陣想玩啲有難度嘅！原來佢家陣玩追網模，我話你又冇內地人有錢，又冇內地人有型，點同人爭呀？佢話我有一個優點！就係只要同囡囡猛講娛樂消息，佢哋就會好開心，事關佢哋好多都發夢做明星，所以你話自己好熟悉娛樂圈，咁啲囡囡就會好樂意同你約會。只要事前買定兩本八卦周刊咪熟佢，咁就已經好夠用，問佢有冇得手過？和仔畀個電話我睇，足足有十幾廿個囡囡嘅電話，仲不斷有短訊聯絡嘅都有幾個，最後和仔仲將手機內嘅照片開畀我睇，足足同六七個囡囡上過床，真係唔封佢做偶像都唔得！