內地夜遊業大地震，夜總會傷到入肉，有傳東莞夜總會收到柯打要即時停業，有人就問咁佢哋入咗啲酒點算？以我大軍所知，最近有大場老細就決定將啲紅酒、烈酒一律以成本價放售止血，不少食肆及酒莊都話入到大量平貨。其實夜場咁做都無可厚非，事關唔知幾時至可以重開，值錢嘅當然放咗先！但問題係點解唔直接放畀酒吧呢？據解釋話酒吧入貨一向有代理跟，因為比夜總會去貨快，因而入貨價更便宜。
而有經常北上嘅玩家就表示，有媽咪向佢兜售過百支烈酒，奈何走私入港境會觸犯法例，見筍嘢都冇得執，不過長居常平嘅玩家就賺錢，因為佢幫夜場散酒，賣出至計數。呢位玩家同我大軍話：「我用市價打七折賣畀啲內地廠商，中間執個差價一樣搵到食！又可放上網兜售，都不知幾好反應！」難怪人人都話內地商機處處，真係發達都冇人知！
撰文：大軍