最近有朋友因為好心兼鹹濕，差啲搞到命都冇埋，叫我真係要喺度報道吓。話說佢有日喺布吉閒蕩，突然有個妙齡靚女，走埋嚟問路，之後就話因為搵唔到朋友，所以幾日都未食嘢，想整十蚊醫吓肚，咁啱老友都未食飯，於是相約靚女去食飯。
兩人叫咗四個餸，大快朵頤之後，朋友問起囡囡有冇地方落腳，佢話冇。朋友好心問佢使唔使幫手租間招待所，個女仔話好，但又怕我朋友破費，仲暗示唔知點報答佢？咁仲使講，梗係以身相許啦！於是兩人就去開房，入到房間個女仔拉低晒啲窗簾。
我朋友自然撲埋去攬住佢，兩人先嚟一輪熱吻，當朋友想剝佢嘅衫時，女仔就叫佢先去沖個涼，朋友入浴室沖完涼，個女仔就畀咗杯茶佢飲，仲話到佢去沖涼，朋友就坐定定歎茶兼等囡囡出嚟，點知突然暈陀陀，最後仲不省人事。
最後當服務員叫醒佢嘅時候，全身值錢嘅嘢都冇晒，足足唔見咗成八千幾蚊。服務員話好彩啲迷藥唔係落得太重，否則有可能一命嗚呼。所以奉勸以後遇到呢啲人，真係千祈咪理佢哋呀！
撰文：大軍