近年內地搞親乜嘢活動，都例必會搵啲三點式女郎嚟做宣傳，而當大家都以為有美女出現，就一定有傳媒到場採訪，原來咁又未必，唔知佢哋係咪工作實在太忙，定係對三點式靚女睇得太多，就算收到風，都未必一定會嚟做訪問。
撰文：小德
就好似喺四月一日，大連有間主題公園開幕，理應大把傳媒嚟訪問至啱，而且負責人仲揀定愚人節嚟開幕，諗住夠晒噱頭，但邀請函嘅回覆反應極差，於是負責人再出招，決定搵嚟十幾位靚女，喺開幕當日走騷兼玩機動遊機，希望引起記者們嘅興趣，可惜反應都係麻麻。消息傳出後，反而引起各地「龍友」嘅興趣，紛紛致電安排行程住宿，人哋畀錢嚟玩，負責人當然歡迎。
據網上消息，當日就嚟咗兩百幾位龍友，目的就係拍攝十幾位三點式女郎嘅一舉一動，囡囡由出場剪綵，一直跟到佢哋玩過山車，龍友嘅鏡頭一直冇放低過，外人睇到仲以為有過百傳媒喺度做報道，但查實真正嚟做訪問嘅記者，只得十零人左右。
如果要論整個開業活動嘅宣傳攻勢，可以話徹底失敗，但想唔到呢兩百幾名龍友，佢哋將相片上載，每個嘅瀏覽人數都近千人，二百幾人乘起嚟，足足有成廿幾萬名網友得知呢個主題公園開咗張，未計轉帖嘅數字，呢個意外驚喜，令負責人大感意外。
於是有專家指出，家陣寄望傳媒嚟幫手做宣傳，不如利用噱頭，引龍友嚟影相，再透過佢哋用互聯網嚟報道，效果會嚟得更快捷有效。其實家陣好多展覽、開張同埋宣傳活動，都係咁樣嚟做宣傳，利用一啲噱頭，先吸引龍友到場，再由佢哋嚟報道事件，如果話題吸引，網友更會相互轉帖，效果將會幾何級數倍增，有時比傳統傳媒更加有效果，如果大家要做宣傳，不妨學吓呢一招！