早前有網友喺論壇發表文章，表示返內地玩樂時，差點成為色誘黨嘅獵物，幸好最後有朋友幫忙先可以逃過一劫。內地色誘黨騙財事件，相信大家都略有所聞，縱使色字頭上一把刀，仍然有唔少男士中招。近年，色誘黨更入侵網絡世界，並透過社交網站找尋獵物，然後藉男人急色嘅心理，趁機劫掠對方。
據了解，社交網站已成為全球大熱嘅交友平台，用戶數目無法估計，甚至已經完全入侵人類嘅生活，甩都甩不掉，唔少男士都鍾意利用尋找朋友系統結識新朋友，又或者希望搵到一段網上情緣，所以佢哋每次結識到異性時，通常都會表現得甚為雀躍，希望成功將對方溝到手，當然最終目的就梗係想食免費餐啦！而色誘黨就利用呢類餓鬼嘅心態，誘騙佢哋出嚟，從中設下色誘騙局。
據一位知情人士所講，色誘黨嘅手法簡單，只需將性感相片上載到網站，即會有男人主動送上門。佢話：「呢啲色誘黨非常明瞭男士嘅心態，事關一般急色鬼見到美女出現都會忍唔住將對方加入朋友行列，加上呢個網站嘅用戶實在太多，所以不法之徒根本毋須費神去尋找獵物。當鎖定目標之後，佢哋就會設局將對方誘騙出嚟。」
此外，網絡色誘黨嘅行騙手法亦係萬變不離其宗，好似利用人嘅同情心，訛稱家人有事，然後向對方借錢應急，當網友信以為真，將錢匯到銀行，咁就真係喊到無謂。另一個常見行騙手法，就係專門針對性急嘅男士，女騙徒先應承對方作不道德交易，再相約到特定嘅時鐘酒店，至於點樣被呃，睇怕都唔需要多講，總之淨係損失錢財已經非常幸運。
撰文：娟娟