眼睛係靈魂之窗，可以揭示一個人嘅心理狀態，無論善惡賢愚，都可以從雙眼反映出嚟。喺相學上分析，原來選擇配偶嘅時候，更要配合對方嘅眼睛，今日就同大家探討男士們四種常見嘅眼形，再分析佢哋適合相配嘅女性眼形，等大家參考一下。
男人眼大大，而且黑白分明，成日含情脈脈咁望人，原來係惹桃花嘅眼睛，呢種人才思敏捷，學習能力強，而且又熱情，可以話深得女孩子嘅歡心，所以桃花極旺，周不時都有異性喺身邊，選擇另一半時候，要選擇一啲單眼皮加鳳眼嘅囡囡，佢哋對丈夫癡心一片，言聽計從，娶呢啲老婆一定冇交嗌。
眼睛向上生嘅男士，好勝心極強，頭腦聰明，永不言敗，可以堅定不移咁向定下目標前進，可惜佢哋唔懂得處理人際關係，不愛言笑，對太太十分專一，但唔識浪漫，咁就最好搵個小眼睛嘅太太，因為小眼睛嘅女性充滿孩子氣，喜歡崇拜大男人，老公唔識得浪漫都唔會詐型。
兩眼距離較近嘅男人，心胸唔夠寬闊，做事會斤斤計較，加上做事過於謹慎保守，工作上難有大嘅發展，但佢十分注重自己嘅外表，希望得到別人嘅尊重，而優點係眼光獨到，能見微知著，咁就最好係搵個兩眼距離開闊嘅囡囡，因為佢哋性格積極樂觀，唔會凡事同丈夫計較。
最後一種係小眼睛嘅男人，佢哋唔輕易表達感情，只會專心努力工作，雖然思想都係保守含蓄，但遇上喜歡嘅女生，佢哋都會主動追求，經歷無數失敗後，最終都會成為勝利者，選擇太太方面，最好搵一個眼睛圓圓嘅囡囡，因為佢哋需要一個活潑開朗，而且又識討人歡心嘅太太。
撰文：小德