今年情人節適逢大年初一，熱戀中嘅情侶，要喺一家團圓嘅日子裏偷少少時間出嚟二人世界，當然到喉唔到肺，於是到咗白色情人節，佢哋都會好好補償一番，而喺情人節正日用錢搵人扮女友過節嘅老友，竟食髓知味，打算再嚟一次！ 撰文：賢
剛過去嘅3月14日係白色情人節，又係星期日，情侶們當然唔會放過呢個慶祝嘅機會，至於一眾宅男，佢哋朋友都冇，唔好話女朋友，咁又打算點樣過呢日呢？有人話繼續打機，以升呢為目標，但亦有人不甘於平淡，於是諗到有人喺春節期間，出錢請人扮女友返鄉下，佢哋心諗返鄉下都得，今次只係搵囡囡出嚟玩一日，應該冇問題啩！於是紛紛喺交友網站上發帖，誠聘美女過節！
佢哋出手都幾重o架，玩足一日由三百至千五蚊不等，而且話明時間係由中午到晚飯後就可以，圍起上嚟時薪一百蚊一粒鐘咁滯，有啲宅男仲寫明只會拖手，不會主動擁抱同親吻，當然女方主動咁做就冇問題，睇嚟十分吸引，但最後竟然無人問津。
有網友歸咎過年期間，有人請囡囡返鄉下共度新歲，點知有晚齊齊飲醉酒，之後仲發生咗性行為，而男方不道歉、不賠償，仲惡人先告狀話囡囡貪錢，令想賺呢啲外快嘅囡囡卻步，但亦有網友話宅男們出手太輕，吸引唔到靚女們為此犧牲。
其實最重要就係內地人口比例，根本就男多女少，呢個白色情人節，有男友嘅囡囡都要陪自己男友過，就算冇男友，亦有大把異性友人約佢哋去街，真係單身冇人要嘅囡囡相信都係賣剩蔗，宅男又點會對佢哋有興趣。有人話點解唔搵髮廊妹？呢啲節日，你估人哋冇老相好咩？可能嗰日仲忙過啲正經囡囡呀！所以話冇女朋友嘅你，都係「的」起心肝自己搵番個啦！歡場無真愛呀！