男人一過四十歲，身體就會漸走下坡，最常見嘅例子就係身體發福、體力不繼、精神不振，最攞命仲係性能力出現減退，所以好多人都覺得係時候要進補調理吓身子，但中年男人應該補乜嘢臟腑最好呢？答案唔係腎，而係你個肝！
中醫認為腎「為先天之本」，上了年紀嘅男士難免腎臟偏虛，適當地「補腎」確實無可厚非，但如果你未到中年，就嚟湊呢個熱鬧，似乎早咗一啲，而且好多男人都有一個錯覺，認為性功能減退，就一定係腎臟出現問題所致，咁樣真係大錯特錯！
中醫師建議大家，中年男士補肝比補腎重要，肝臟主疏洩、喜條達，以通為順，如果肝氣不舒，人體嘅氣血運行就會出現紊亂，引致其他器官失調，令身體轉差，同時中年男性正處於工作上嘅拚搏期，一個人承受着極大嘅心理壓力，令肝臟加重負荷，例如多思焦慮、夜睡失眠、脾氣暴躁等，都會令肝臟壓力大增，加上城巿人唔健康嘅飲食習慣同埋缺少運動，都係致病元兇。
專家認為肝臟乃人體嘅「化工廠」，把食物新陳代謝，抽出重要物質流遍全身供應各器官嘅營養，並且把有害嘅物質進行處理，所以肝臟一出問題，身體其他器官都好易出毛病，例如肺部、腸胃、腎臟、心臟、淋巴、生殖器官等，都好容易出事。
肝主人體全身嘅筋，而男性生殖器就係最大嘅一條筋，出現功能減退，就係暗示你嘅肝臟可能出現問題，而十二經絡中肝經就係圍着男女嘅生殖器循行，所以不只男性，中年女性嘅婦科病特別多，亦都係意味肝臟出問題，所以中醫師建議大家補肝，至於點樣補法？咁就要請教吓你嘅中醫師啦！
撰文：小德