男士之寶

古時中醫師嘅著作中記載：「男子不可百日無薑」，可見薑對男性嘅重要，據現代臨床藥理學研究發現，薑具有加快人體新陳代謝、抗炎鎮痛，同時能興奮人體多個系統嘅功能，還可以調節男性前列腺機能，治療男性前列腺疾病以及性功能障礙，因此被譽為男性健康嘅最佳保健食品，特別係中年男性，會因胃寒而導致食欲不振、身體虛弱，原來只要含服鮮薑片就有幫助。

中醫師認為口含鮮薑片能刺激胃液分泌，促進消化功能，但因為曬乾嘅薑片含燥性，不能產生滋潤作用，相反鮮薑片就能起滋潤作用，令機能得到回復，而所謂鮮薑，亦有分子薑和老薑，如果要口含薑片建議用子薑，因更有生發之氣。

老薑外貼

提供一個小秘方，就係每天早上切四、五片鮮薑片，然後用熱水泡一杯薑茶，如果初飲怕太辣，可加入少量紅糖，但最好係淨飲，飲用後渾身發暖，再將薑片放入嘴裏慢慢咀嚼，讓生薑嘅氣味喺口腔內散發，開鼻腔氣管，生津潤肺，再而刺激腸胃，加強三焦運作，對身體有好處，冬天經常飲用，患上感冒嘅機會都會少啲，提醒一句，薑腐爛嘅地方不可食用，否則會傷肝臟。

介紹過子薑都要介紹吓老薑，老薑藥用療效廣泛，可治風寒、胃寒、腹脹、惡心等症，除了配食物內服之外，仲可以用嚟外敷，可放一片老薑於命門、臍下嘅地方能有助血液循環，活血止痛，男性血氣暢旺，有關性功能障礙嘅問題自然可減少。

撰文：小德