撰文：小德

由朝玩到晚

古相書有云：「無鬢生毛滿面過，通同到處隨人宿」，可以睇出面上生有毛毛嘅女性嘅特點。一，家庭觀念一般，成日唔黐家；二，性生活特別開放；三，就係桃花勁旺。古代女性，如果擁有其中一樣，都會畀人視為淫婦，家陣三味齊全，其嚴重程度可想而知，但乜嘢面毛先至係淫相呢？如果薄薄一層，好似絨毛一樣，咁就唔算，如果又黑又粗，刮完好快又生，咁就要小心。

另外，如果只有上唇部分生出鬍子，咁都唔算有問題，但如果由髮鬢一直生落下巴，好似男人生鬚咁樣，咁就麻煩啦，表示你精力特別旺盛，活力過人，由朝玩到晚，所以實畀阿媽話唔黐家，其實就係想要發洩過多嘅精力。

惹桃花入宅

屬運動型囡囡，由於要發洩過多體力，所以食欲特別強，而且又控制唔到，一唔做運動，就會變為肥妹，所以好多肥妹，面上都有深色嘅面毛，就係食欲無法控制，所以搞成咁樣，到過咗青春期，就會改為縱情色慾。

因為自身無法控制，任由本能去決定，所以一見到男人就會意亂情迷，就算婚後都無法改善。如果配埋「頭仰窺視面有毛，額方冒大殺夫刀」，咁佢哋唔止晚晚去鬼混，而且仲會惹桃花入宅，傷害到丈夫，就算唔係有心傷害，都可能因感情拗撬而起衝突，所以滿面毛毛嘅囡囡，最緊要學識控制慾念先至得嘞！