不切實際

最近坊間啲玄學家，都稱女士「胸懷大痣」，其實只係「空」懷大志，意思話呢啲囡囡，大多數都係只會發白日夢，講多做少，唔會腳踏實地做人，所以難有成功，但又點解喺娛樂圈有咁多「胸懷大痣」嘅女明星女歌星闖出名堂呢？

因為愛發白日夢，做人不切實際，其實只解釋到佢哋性格嘅一部分，換個角度嚟講，佢哋實際係浪漫主義者，喜歡活喺自己嘅童話世界裏面，所以要佢做計劃，佢哋真係唔掂，但叫佢哋吹水講夢想，佢哋就可以創意無限，同你講三日三夜，而且浪漫主義嘅人，受壓能力極弱，做嘢欠耐性，要佢長時間做同一樣嘢，會畀死更難受，所以畀人有唔想做嘢嘅感覺。

有新鮮感

但如果佢哋投身娛樂圈，情況就會唔同晒，最緊要唔使用腦去諗嘢，甚至生活都有人安排晒，佢哋可以將全副精神體力，去做一啲發夢至做到嘅事，例如拍戲、唱歌等等，所以表現一定會畀別人理想，釋放出嚟嘅感染力亦都會畀別人強。

此外，拍戲、錄唱片、演唱會等，由籌備到完成，短則幾個月，長則一年半載，以佢哋嘅耐性，勉強仲可以應付得嚟，而且每次合作嘅人唔同，地方唔同、演繹唔同，對佢哋保持到一份新鮮感，所以絕對唔會有厭惡感覺，做起嘢嚟更起勁，所以「胸懷大痣」嘅女生，做其他正常嘅工作，就會難有成功，但如果入娛樂圈，話唔定會闖出一條血路，當然，自己嘅努力亦好重要。

撰文：小德