小娟今日同阿花去補習學校，心諗啲補習老師，會唔會係廣告上嘅咁靚仔？點知去到，發現原來係阿叔一名，呢個阿叔唔止生得樣衰，仲甩晒頭髮，成身煙味，講嘢仲窒窒口，成個牙擦蘇咁樣，搞到小娟同阿花都冇晒心機，成堂喺度發夢。
當阿叔講到呢段課，小娟同阿花都即時扎醒，阿叔話：「有啲嘢畀唔識嘅人一摸就要報警，但識得嘅人，點摸都可以，而且愈摸愈興奮，愈摸愈開心，有時就咁摸都唔滿足，仲會搵埋道具嚟整佢，特別啲窿窿嘅地方，仲要搵嘢通一下。」
小娟同阿花聽到眼都凸埋，阿叔繼續：「當用完道具之後，就要用眼細心檢查每一處地方。」小娟：「呢個阿叔喺度講乜嘢呀？」阿花：「好似喺度講緊鹹濕嘢！」小娟憤然：「豈有此理，竟然喺班房裏面講鹹濕嘢！唔教訓佢又點得呢？」
阿花阻止：「你咪咁衝動，聽埋落去先啦……」阿叔繼續：「呢啲行為我哋要經常做，如果唔係，放埋一邊，個零月左右就會發霉，所以如果你哋有嘅就自己清理吓，冇嘅就搵人清理吓，唔清理佢……哎呀！呢位同學你做乜打我呀！救命呀！」
睇嚟小娟又抱打不平，但今次似乎又係誤會，至於誤會乜嘢，大家又估唔估到呢？
選擇：
1. 阿叔講緊女性衞生
2. 阿叔講緊乳房檢查
3. 阿叔講緊古物整理
4. 阿叔講緊鹹書處理
答案：3. 阿叔講緊古物整理
解釋：呢位阿叔講緊通識堂，咁啱講起博物館古物嘅處理，所以唔認識嘅人一摸就要報警，至於工作人員就冇問題，而且愈摸愈開心。之後用清理嘅道具清理一下，要留意啲窿位，清理後再用眼去檢查清楚，最好每月清理一次，至於小娟點解誤會，真係要問佢至知。
小德