額頭反光太自私

古時嘅所謂美女，喺相學嚟講，命運大多數都係唔好，因為太靚女，輕則天妒紅顏，體弱多病，重則傾國傾城，禍國殃民。今時今日做靚女絕對好處多多，但仍然有唔少靚女，經常畀失戀、排擠、冇成就嘅問題困擾，原來又係同佢哋嘅面相有關。

原來有啲靚女個鼻生得太挺，成日話鼻挺會享夫福，未婚時追求者眾。但據師傅講，鼻生得太挺，鼻樑好削，好似一把劍嘅話，就算有人追，關係都唔可以持久，經常飽嘗失戀滋味。

另外要留意埋額頭，如果冇化妝時，額頭都係反晒光嘅，呢啲叫做「照夫鏡」，對另一半會有刑剋，考慮事情只會顧自己，唔會考慮埋其他人，工作會有唔錯嘅發展，但姻緣運差，因為冇乜男人頂得住呢啲性格。

唇薄如刀易傷人

好多靚女經常遭同性朋友或同事排擠，據梁師傅講呢個現象，好多五官標致嘅靚女都會遇到，原來同佢哋把口生得太靚有關，好多嘴唇紙咁薄嘅靚女更會咁樣，但原因唔關其他人嘅事。相書裏面講，女性嘴唇太薄，表示講嘢好叻，而且叻之餘講嘢過於刻薄，有時傷害咗人都唔知，所以身邊難有朋友；如果加埋把口合唔埋嘅，表示佢愛搬弄是非，專講人家嘅壞話，試問咁嘅同事或者朋友，又會有邊個喜歡同佢交往。

此外好多靚女發脾氣時，成日喜歡「嘟」起個嘴，一嬲就嬲足成日，搞到嘴角向下生，據師傅講如果嘴角向下表示講嘢同思想嘅內容都偏向負面，嚴重影響人際關係，所以靚女們真係要小心把口，否則搞到一個朋友都冇。

兜風耳太愛冒險

好多靚女成世人一事無成，渾渾噩噩，原來佢哋生有一對兜風耳，據梁師傅講，耳朵生成兜風耳，表示兒時出生嘅家庭一係好富有，最後會家道中落，落魄潦倒；一係出身於貧窮家庭，最後會憑一己之力白手興家。有這種耳仔，表示囡囡思想前衞大膽，有冒險精神，做人處事全憑個人喜好而決定，如果出生貧苦家庭，有機會創一番事業，但要守業，佢哋又唔係咁嘅材料，所以最終都係失敗收場，風光一輪後，便會打回原形，最後一事無成。

最後要留意埋雙眼，如果眼珠太細，見眼白太多，即係所謂「四白眼」呢種人報復心強，心腸狠毒，個性極難同人相處，所以做事難和人合作，要靠自己一己力，就算贏得剎那嘅光輝，最終都係過眼雲煙，大夢一場。

撰文：賢

鳴謝：玄學家梁瑋鈞師傅