兒時夢想

經常聽到人哋話「要做好呢份工」，但講嘅人多，實際做到嘅人卻係屈指可數。水着女優小松彩夏卻唔同，不但做好水着女優呢份工，而佢更視水着女優為終生職業，希望有朝一日能夠成為水着天后！點解小松妹如此熱愛呢份工呢？

小松妹解釋：「我之所以如此熱愛水着女優呢份工作，係同我細個時候嘅夢想有關。」原來小松妹嘅父親係一個標準嘅水着迷，屋企收藏咗大量嘅水着女優寫真，而小松妹喺耳濡目染嘅情況下，對水着女優嘅工作充滿着憧憬。小松妹笑道：「見到水着女優咁受水着迷歡迎，真係好滿足，好似成個世界圍住我轉咁，從嗰陣時起，我便夢想成為一個廣受水着迷歡迎嘅女優，就算要我走更加性感嘅路線都冇問題！」

表現自我

至於另一位人氣水着女優辰巳奈都子，佢之所以咁積極工作，不斷推出新寫真，性感程度愈嚟愈高之餘，近年更染指藝能界，實行嚟個多棲發展。不過問到辰巳妹鍾意水着工作，抑或藝能工作多啲時，辰巳妹便認為水着嘅工作，最能讓佢得到滿足感。辰巳妹表示：「我知不少人視水着女優為投身藝能界嘅踏腳石，而我卻唔係咁諗。事關我熱愛水着工作，係同我加入水着界嘅原因有關。」

話說當年辰巳妹係個冇乜自信嘅人，莫講話喺鏡頭前着泳衣影相，就連去到海灘，都唔敢只係着住泳衣周圍走。為咗提升自信，便決定投身水着界，從而建立自信。辰巳妹就話：「起初我都唔習慣，但後來慢慢地解開心結，並得到前輩鼓勵，自信心慢慢地建立起嚟。依家唔單止夠膽只係穿着泳衣出現喺鏡頭前，甚至更大膽、更性感嘅造型都冇問題。」

不設底線

既然兩位水着女優不約而同地認為，就算再性感啲都冇問題，咁係咪意味着，以後嘅寫真將會嚟得更加性感呢？小松妹笑道：「如果水着迷希望睇到我更加激放演出嘅話，要我再性感啲都冇問題，事關我並無為自己設下性感嘅底線，只要拍出嚟嘅效果好，並讓水着迷睇到我性感嘅一面，就算要我半裸演出都冇問題。」

聽到小松妹咁講，辰巳妹亦點頭道：「依家嘅我對自己充滿自信，不論泳衣或內衣，都唔會令我卻步。只要大家願意繼續支持我嘅話，將尺度放得低啲亦冇問題，最重要就係得到大家嘅認同，咁我就已經非常滿足。」如果係咁嘅話，相信水着迷以後將會睇到兩位人氣水着女優，更加精彩嘅演出！

撰文：阿豪