曲線盡現

近年人體彩繪呢種玩意時不時都會喺香港出現，出現嘅地方大部分都係大型展覽，例如係內衣展，藉住鮮艷油彩加上模特兒驕人身材嚟吸引大家嘅注意力。不過，若果論到精彩，就真係唔及奧地利每年一次嘅人體彩繪節喇！

喺嚟緊嘅7月13至19日，一連七日，人體彩繪節就會盛大舉行，今年已經係第十一屆，每一次都吸引到過萬名來自世界各地嘅人嚟到欣賞，因為人體彩繪實在太偉大喇！冇誇張㗎！只要大家當日有幸到去奧地利，就可以睇到一群又一群身材性感嘅女士，佢哋身上全部都塗上五顏六色嘅油彩，而油彩極具藝術感覺，有山水畫、人像畫，抽象畫亦唔少，換言之每一個彩繪模特兒經過嘅時候，就好似一幅畫行過一樣，絕對值得駐足欣賞！令人覺得自己突然好有藝術氣質。

大家唔識欣賞佢哋身上嘅彩繪都唔緊要，因為一班女模特兒身上三點都貼上膠紙，嚴格嚟講都算係赤裸裸，嬌美嘅身材一樣表露無遺！不過，大家應該唔會咁膚淺，只係欣賞佢哋嘅身材啩？

你肯剝我肯畫

睇到咁多彩繪靚女通街走，相信各位男士亦一定覺得相當養眼，睇到唔捨得走喇！然而，外國人搞活動一向注重互動，好希望與眾同樂，所以人體彩繪節亦會秉持呢種態度，同其他人士一齊享受人體彩繪呢門藝術。

主辦單位一早已經安排來自世界四十國家嘅人體彩繪藝術家，於彩繪模特兒巡遊嘅街道上設好檔口，只要大家有意思將彩繪畫上身上，大可以走到檔口除低衫，然後向藝術家講自己想畫邊類型嘅彩繪，專業又細心嘅藝術家就會慢慢幫你畫靚佢。基本上，因為藝術家都有大會贊助，而且一心想將人體彩繪發揚光大，將之推廣到社會每個階層，再加上佢哋個個都係狂熱分子，有人欣賞佢哋嘅彩繪，覺得係幾生修到，所以費用一般都係全免。所以，千祈唔好怕醜，一於走多幾檔，畫多幾幅彩繪，有便宜唔使洗頸就當然啦！最爽就係檔口總有女士幫襯，入去欣賞一下肯定大飽眼福。

派對狂歡

大飽眼福之後，相信係人都覺得精力無處發洩，大家唔使怕，因為每日巡遊完結之後，主辦單位都會大搞派對，畀大家一個發洩機會。而派對亦會切合彩繪主題，需要參加者塗上彩繪先可以入場，所以派對內一樣係充滿特色彩繪以及性感誘人嘅美女！

當然，要成功突圍而出，吸引美女嘅目光，大家一定要搵個猛人藝術家幫人畫個特色彩繪，若然配合自己結實嘅肌肉一定相得益彰喇！另一方面，派對之內有酒飲又有美女同大家談談情，跳跳舞，節目亦算精彩。不過，真正精彩嘅仲喺後頭，因為每晚派對都有專業嘅彩繪雜技團到場演出，雜技團嘅團員個個都身材一流，技藝高超，將雜技與其性感胴體合而為一，而精彩嘅雜技包括噴火、吞刀，仲有空中飛人表演，睇住性感女團員捉住條絲帶於空中到處飛舞，感覺一定分外刺激又興奮！

撰文：賢