體貼入微
依家叫啲女仔溫柔啲，十居其九都當你發噏風，皆因佢哋將溫柔同冇性格扯上關係。如果對男友溫柔嘅話，即係代表佢哋對男人委曲求存，喺朋友面前乜面都冇晒。不過木口亞矢卻唔係咁睇，佢表示：「對男人溫柔，又唔一定冇面嘅。只要識得利用溫柔嘅話，溝仔便會非常容易。不論佢係高大型男或健碩猛男，只要你嗲佢兩句，間中對佢噓寒問暖一番，佢自然會對你死心塌地。」
不過你唔怕咁做，會畀其他女仔話你冇用咩？木口妹笑道：「如果身邊嗰個男友唔夠靚仔嘅話，就真係畀人笑！故此，我好着重點樣能夠對男仔好啲、體貼啲，從而綁實佢個心。」點樣着重先？木口妹就話：「我最拿手嘅方法，就係炮製愛心晚餐。因為我對食非常有興趣，而我亦對心儀對象嘅口味非常留意，只要掌握佢哋嘅口味，加上我細意烹調嘅晚餐，佢唔對我動心都幾難！」
齊做運動
木口妹識得用巧手美食籠絡男友個胃，從而箍住佢個心，唔知另一位靚女石井香織，佢又有乜嘢辦法利用溫柔體貼嘅態度，得到男伴嘅歡心呢？石井妹笑道：「其實我好贊同木口妹嘅講法，女人如果想溝到心儀嘅男士，單係講靚、講性格係冇用嘅。事關男人睇女仔，唔係要佢喺人面前如何地識得表現自己，而係希望佢能表現出溫柔嘅一面。不過我同木口妹唔同，因為我煮嘢非常難食，驚佢試過我嘅手勢後，嚇到以後唔敢同我喺埋一齊。由於我嘅專長係運動關係，故此我會從呢個方面出發，經常陪佢去做運動，從而加深我哋彼此間嘅認識，關係亦能有長遠嘅發展。」
話雖如此，但經常陪住男友做運動，唔知佢會唔會覺得冇晒自由呢？石井妹笑道：「梗係唔會啦！以我嘅前男友為例，佢就最鍾意同我一齊做運動，因為當佢做得攰嘅時候，我就會遞毛巾畀佢之餘，又會斟茶遞水，如此體貼嘅態度，佢又點會唔滿意呢？」
相輔相成
既然兩位靚女對男友咁體貼，相信對方都會以同樣嘅態度對番你哋啦！木口妹就話：「梗係啦！因為我哋睇男人非常準，唔會揀到賤男，男友對我同樣非常體貼，尤其上床時，動作絕對唔會粗鹵。你知啦！好似我呢種弱質纖纖嘅女仔，萬一被男伴以強而有力嘅動作衝擊嘅話，不但唔會體會到快感，反而可能因此而受傷，是以我極力要求我嘅男友，同樣以溫柔體貼嘅態度對我。」
聽到木口妹咁講，石井妹便掩嘴笑道：「唔怪之得你一直都話要對男友溫柔啲啦！原來目的就係希望男友能夠學似你一樣，同樣對你溫柔無比。不過話說回來，不少男人都係咁嘅性格。如果你對佢好嘅話，佢會對你好一倍。當然呢個世界少不免會有唔識珍惜嘅男人存在，但總括而言，我迄今為止仍未遇到呢啲男士。故此，我嘅床上生活仍然非常滿足，全賴我哋對男友溫柔咋！」
撰文：阿豪