撰文：賢
除衫種花
喺美國，好多人屋企都係一棟兩層嘅獨立式花園洋房，屋主除咗可以享受自成一國嘅樂趣之外，仲有個花園可以養隻狗看門口，生活確係非常寫意。當然，有個咁大嘅花園，梗係唔可以淨係養隻狗咁浪費啦！幾大都要種下花草樹木，令自己個花園添姿采。而且園藝仲可以令人心曠神怡，更加可以藉此增加親子接觸，不失為一個良好消閒娛樂。最近有人發現園藝並唔單止係消閒活動咁簡單，原來仲可以令人感受到天人合一嘅感覺！呢個就係美國一個名為「光豬園藝日」嘅特別活動！
記得去年都同大家介紹過，呢個園藝日喺每年春天都會依時節舉行，今年嘅舉辦日期則已經定於5月2日！只要大家屋企如果有後花園，大可以於當日除晒衫褲，然後拎起泥鏟種吓花，咁就可以表示響應！但係諗深一層，香港法例相對外國較為嚴謹，大家剝光豬玩園藝有機會畀人控告，都係疊埋心水精神上支持呢項活動啦！
打破隔膜
大家精神上支持已經好有心㗎喇！相信美國嗰邊嘅主辦單位亦都好明白。然而，大家又有冇諗過，點解會有人發起呢個活動呢？
其中一位支持者John Muir就表示：「原因好簡單，就係好玩喇！世界上已經有好多活動被人以裸體形式進行，例如游水、打排球、踢足球等等，而根據資料顯示，園藝係繼游水之後，第二種最想以裸體進行嘅活動！另外，我亦覺得我哋嘅文化應該趨向於增強市民與大自然互相接觸，同時亦要增加大家對自己身體嘅接受程度，而光豬園藝日就正正對上述兩種情況有改善作用喇！另一方面，當我哋剝光豬喺陽光之下裁種植物嘅時候，可以感受到陽光接觸肌膚，好似受到陽光擁抱一樣，亦令我哋得悉日光浴並唔係日日都可以享受，從而了解到一個人存在於地球實在係相當值得慶幸，人與人之間唔應該再存有隔膜，應該赤裸真誠相對！」嘩！原來呢個活動咁有意義，真係唔講得笑喎！
改變世界
其實今年嘅光豬園藝日已經舉辦到第五屆，而每年都有相當多人參與，當中則以美國俄勒岡州以及三藩市最多。所以，大家若然喺5月2日有幸飛到去呢兩個地方，不妨逗留耐啲，睇吓有冇女士會赤裸響應是次活動喇！不過，大家睇還睇，千祈唔好用有色眼鏡去欣賞呀！欣賞完之後，相信大家一定會對園藝以及裸體有更深層次嘅體會，而呢個亦都係活動之所以用裸體進行嘅原因之一！事關主辦單位都表示，好多人遊行都會光脫脫以爭取更大注目度，園藝日為咗影響全世界，亦同樣套用呢個方式。
不過，事實上又並唔係有太多人了解箇中意義，認為光脫脫咁玩園藝有傷風化，所以光豬園藝日其中一個響應者Jay North就表示：「我每年都有支持呢個活動㗎！
不過，我嘅鄰居就絕對唔多支持喇！事關佢哋每次見到我光脫脫咁玩園藝都會打電話報警，不過佢哋咁多次報警之後，我都冇一次被起訴，因為我只係喺自己屋企花園裸露，亦冇做猥褻行為，而佢哋呢種做法就更加刺激起我嘅決定，繼而支持呢個活動，希望全世界都打破種種隔膜！」好，我精神上支持你！