政情：搭巴士沉醉夢鄉 陸頌雄被偷拍睡相

以前有議員話朝朝早搭巴士返去金鐘立法會，因為長途又有位坐，上車瞓一陣就到。陸頌雄尋日就喺社交平台上載咗張相，貼文話「放工回家路。瞓着，是態度。」睇落佢係身處巴士上層，頭耷耷，雙手垂低瞓着咗。有網民留言話「尊貴的陸議員沒有專車接送？」亦有人話「呢碗飯唔易食㗎」、「經常身心疲累！」可能知道陸頌雄呢排又要去深圳上堂，有網民話「又返學、又返工真係辛苦」，甚至話佢多咗好多白頭髮添！

另有網民似乎係讚陸做議員貼地，留言話「你識做，議員應要務實同體驗多啲基層生活，譬如坐巴士、坐地鐵，唔好好似有啲議員，有專車接送就唔識搭巴士、地鐵同電車。」