昔日東方政情：「隱形」穆家駿 竟自薦做公關宣傳
身兼民建聯成員嘅中學老師穆家駿喺早前東京奧運舉行期間，因喺Facebook（Fb）發表惹火言論，掀起「球衣風波」遭各界抨擊，搞到民建聯一身蟻！之但係喺新一屆青年民建聯出任副主席嘅佢，竟然仲可以主力負責宣傳公關工作。雖然佢負責對外公關工作，但尋日就缺席傳媒茶敍，唔通係怕被當面問起事件而選擇再度「潛水」？
釀球衣風波被圍插 一度「潛水」
事緣穆7月時喺Fb專頁發文「強烈譴責」香港羽毛球「一哥」伍家朗喺出戰男單分組賽時，身穿冇印上香港區旗標誌嘅球衣。穆事後畀網民圍插，需要就言論語氣過重致歉，更曾關閉Fb專頁「潛水」，相隔一個多月先再靜雞雞「上水」。不過佢就一如既往，頻頻喺YouTube上載影片細說歷史，好似無事發生過咁。
之但係釀成公關災難嘅穆都可以負責宣傳公關工作，究竟佢哋係點做呢個決定呢？青年民建聯主席施永泰就回應話，相關程序係先由個人自薦，再通過黨內及青民挑選，又指穆係黨內較有名嘅KOL，經營嘅YouTube頻道及微博都有大量追蹤人數喎。
不過，穆自風波後較少公開露面，至於佢幾時先會再公開現身呢，施就話茶敍原本喺上周日（10日）舉行，當日穆亦可出席，惟最終改期至尋日舉行，穆因為要出席清華大學網課所以先冇現身。
鍵盤戰士仍未敢公開現身
其實穆自風波發生後搞到一鑊粥，唔單止影響自己，仲拖埋民建聯落水，有黨員仲要對外為其解畫，試圖將個波推落香港羽毛球總會，話球衣問題在於該總會安排不當，之但係公眾就唔係好受落。相反，穆就只係匿埋做「鍵盤戰士」，從來冇公開現身回應，依家仲搵佢負責公關工作，難道唔識死，唔怕再有新一波公關災難發生咩？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
