政情：民主黨參選與否 開完大會無定案

民主黨主席羅健熙喺特別會員大會後嘅記者會話，會上有唔少黨友認為未有黨員發出參選意願，所以認為黨唔需要急住作出參選決定，但另一方面亦有黨員擔心會因此出現黨員即使希望參選，但唔敢表態嘅情況，故會員大會決定授權中委會處理，中委會將設甄選程序，若有人報名，就會安排相關黨員接受質詢，再視乎有否資格參選。

羅對會議未有具體決定表示抱歉，兼承認決定同之前講法有落差，但佢就相信呢個係最有效、最唔會被挑戰，以及有利黨內團結嘅決定，又可以為黨員提供渠道表達參選意欲喎。之不過，呢個都唔知算唔算係決定嘅決定就疑點重重，事關民主黨嘅所謂決定令人感到佢哋只係拖延時間，希望大眾對民主黨公唔公布參選呢件事淡忘，更加似係想將是否參選嘅責任推畀想參選嘅黨員囉！

喺記者會上，羅都被問到個別「主戰派」黨員有冇出席，羅就話唔會特別評論喇，但強調無聽聞過有黨員明確表示希望參選。據悉，民主黨黨內嘅「主戰派」，即前議員鄺俊宇、副主席梁翊婷同中委蘇逸恒都冇出席，而另一個中委曾自鳴雖然有出席但就無發言喎。

不過，講到最大嘅主戰派，就一定係民主黨創會黨員、前議員李華明喇！李早前已表明民主黨應該參選，話若果民主黨決定不參選，將會無奈退黨。佢形容今次會議未有決定係「幾好」，又希望「畀啲空間中委會決定」。佢又話本來以為自己支持參選係少數派，但發現會議上有唔少黨員持相同意見，對此感到意外，又話該黨應該會再召開會員大會嘅。

話時話，前排有指民主黨內部大多主張唔參選，但係尋日特別會員大會決定唔到，又話交畀中委會設甄選程序，似係開條參選路，再睇吓支持參選嘅李華明話喺特別大會上發現唔少黨員有相同意見，睇嚟事有蹊蹺，究竟邊個冇講真話？