政情：丟空校舍淪黑暴武器庫 教局責無旁貸

立法會尋日通過喺觀塘安達臣道發展區，以及喺沙田火炭坳背灣街各興建一所小學作重置校舍安排，各涉及逾3億元，將交由財務委員會再討論。議員柯創盛指觀塘道有一所校舍丟空多年，認為該處位置非常良好，唔應該「霸咁耐」。佢話社會資源緊張，有條件的話應用以興建房屋，若然唔適合則可交由其他政策局作社會服務用途，而唔係長期丟空校舍，予人喺黑暴期間放置武器、放炸彈。

柯創盛所指嘅空置校舍，荒廢已逾十年，去年警方就喺裏面搜獲一批爆炸品。教育局副局長蔡若蓮指局方曾考慮將呢所空置校舍，供另一間小學作重置安排，但後來發覺唔理想，現時會交由中央調配機制處理。工程界議員盧偉國就話，即使教育局已交由其他政策局負責管理用地，但市民見到空置嘅係學校，都會認為係由教育局負責，指局方「呢隻死貓冇得唔食」。