政情：議辦執笠 韋少力仲要「裝修」

自前年反對修訂《逃犯條例》風波之後，「裝修」暗指搗亂！而韋少力所講嘅「裝修」，只不過係遮蓋「議員」嘅職銜同相關嘅標誌。日前韋少力大清早就返到位於西灣河嘅議員辦事處，揚言「自己議辦自己裝修」。跟住就用黑色封箱膠紙，遮蓋招牌上議員職銜同埋東區區議會標誌，無論中、英文都無遺漏。後來韋又去到康東邨辦事處照辦煮碗，今次就連自己嘅姓名都遮蓋埋，都算「裝修」得夠徹底啦。

另一位遭褫奪議員資格，南區前區議員彭卓棋亦宣稱其議辦已停止營運，議辦門外嘅議員職銜亦已遮蔽。對於宣誓不被接納為有效，彭話明白、理解及接受相關嘅決定，但唔會影響佢今後仍繼續支持及擁護《基本法》，又話未能繼續透過議員身份跟進個案，實在抱歉咁話。