政情：主席羅庭德撐光時北區區會促請辭

繼元朗區議會上星期發生民主派議員「叛變」事件，副主席拱手畀咗鄉事派後，北區區議會亦有民主派議員疑似臨陣逃脫。該區會原副主席、民主派陳旭明早前辭職，尋日經選舉後，其空缺由身兼沙頭角鄉事委員會嘅當然議員、鄉事派嘅李冠洪填補。及後，建制派議員侯福達提出臨時動議，指主席羅庭德嘅言論影響國家同香港嘅安全，要求佢辭職，其動議喺建制派支持下獲通過。

鄉事派當選副主席

話說北區區議會原來22個議席當中，建制同鄉事派只佔7席，民主派就有15席。但早前有11名區議員先後辭職，民主派席位銳減至4席，只剩羅庭德、周錦豪、張浚偉同民主黨黃凱盈，但黃缺席尋日嘅會議。結果民主派張浚偉同鄉事派李冠洪角逐副主席，張就獲得3票，李則以7票當選。有議員問到黃凱盈點解缺席，羅只係話未有收到對方嘅缺席申請。之不過喺形勢比人強嘅情況下，呢一票亦難以力挽狂瀾。

喺建制派取得主導權後，李提出臨時動議，要求即時解散6個委員會及所有工作小組，並重組成4個委員會及成立宣傳工作小組，現時工作小組嘅撥款全數撥回區議會。而喺「6合4」重組後，改為社會事務委員會、交通及運輸委員會、環境改善及文康事務委員會和土地發展、房屋及工程委員會，刪除保安事務委員會。

到咗會議尾聲，侯福達突然話收到市民嘅電郵，指主席羅庭德支持「光時」等「出位」言論。羅就回應話支持「完善」選舉制度，表明任何情況會繼續盡力履行職責，服務北區居民，「對得住自己、選民同香港人」。

建制指羅影響國安

羅語音剛落，侯就將該份電郵交到羅嘅面前，隨即提出臨時動議，指羅嘅言論影響國家同香港安全，要求羅立即辭任區議會主席，動議喺建制派支持下獲通過。

面對不利自己嘅動議得到通過，羅庭德話自問過去擔任主席做法不偏不倚，致力地區民生、跟進發展工程及關注北區整體發展，例如成立小組處理民宿牌照問題、跟進粉嶺等新界北發展等基建工程，深信「對得住」自己、選民、香港人，會繼續喺崗位服務市民，並善用每分每秒。

至於會否憂慮被DQ？羅只係重申自己愛國愛港以及支持完善選舉制度，又話從政者要有承擔，無論北區區議會形勢如何，民生都不應關乎板塊問題，會繼續用以往方式做事。