政情：遲交議案 梁美芬錯失辯論機會

梁美芬早前抽到喺下月1日嘅立法會大會中辯論議員議案，不過內務委員會尋日指梁美芬喺議案預告期限屆滿後，決定放棄辯論時段。佢向本報記者解釋，原來係冇諗過咁快抽到時段，令到成件事好倉促，去到限期當日發現有議案字眼需要修改，咁啱撞正聯同所屬政黨經民聯同特首會面提交《施政報告》建議，遲咗大約10分鐘提交議案，咁就錯失咗機會喇。

問到佢原本想提出嘅議案內容，梁美芬就賣關子，唔肯透露詳情。佢話希望可以喺今屆任期內重新抽到時段提出議案，如果咁唔好彩失敗，或者會召開記者會介紹議案喇。