有性趣：羊骨入饌益腎強筋

羊骨係一種營養豐富嘅食物，當中蘊含磷酸鈣、碳酸鈣、骨膠原等成分，係補鈣健骨之選。喺中醫角度，羊骨味甘性溫，歸腎經，《別錄》、《綱目》、《飲膳正要》等中醫藥典籍都有記載佢嘅好處，包括補腎虛、通督脈、益氣血、強筋骨等等，可以治療虛勞羸瘦、腰膝無力、筋骨攣痛等問題。另外，經常食用羊骨對於腎虛遺精等症狀有很好嘅療效。

以羊骨入饌，一定要用新鮮貨色，肉色要鮮紅均勻，肉質要緊密有彈性，外表略乾不黏手，最緊要係無其他異味。除咗可以用羊骨嚟熬湯，亦可以煲番個羊骨粥。據《飲食正要》記載，只要預備用羊骨一副，將骨頭稍稍敲碎之後，加入適量白米、陳皮、薑、草果、鹽，再加水煲成粥，就可以食用，對治療虛勞腰膝無力好有效。