昔日東方絲絲講場：麵粉價貴 日本仔諗到食「米粉」
俄羅斯及烏克蘭都係農產品出口大國，俄烏局勢加劇食品通脹，小麥就係其中之一。話說小麥係麵包、啤酒同意粉等等嘅原材料，如果小麥漲價，其他食品成本都會上升。不過，正所謂「窮則變，變則通」，日本就諗到新方法取代小麥，聽落好似幾好食添！
日本主要麵粉加工企業6月開始上調麵粉批發價格，7月就加埋家用麵粉價。不過，另一方面，大米價格正在下跌，較今年初平咗足足兩成，日本人就諗到用大米產品代替小麥。
大米磨粉製餃子皮好受落
日本人首先改變餃子皮材料，用100%大米磨成粉製作餃子皮，變成正宗「米餃」。批發商話，自去年11月在全國超市發售以來，銷量大幅增長，加上日本人好鍾意有咬口嘅煙韌口感，用大米粉做餃子皮，簡直啱晒嘴形。批發商仲話，佢係一種非常健康嘅餃子，不含麩質，口感清爽。
唔止「米餃」，連大米粉披薩都有！披薩麵糰通常用小麥粉製成，自從小麥漲價加重成本，有餐廳就改用大米磨粉整餅底，5月已經發售明太子同燒雞肉兩款披薩，食客試過都話披薩底有嚼勁。米粉吸收比小麥快，唔止價錢平啲，仲有助消化咁話喎。
余絲韻
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
