獨家訪問：18歲期望搞個唱 開工連踩3日3夜 鍾柔美上堂瞌眼瞓

「聲夢小花」鍾柔美（Yumi）近日拍完無綫劇集《臥底嬌娃》，劇中做自己演女團成員。現時正修讀副學士的她，試過連續3日3夜開工又返學：「好記得拍劇到凌晨跟住返學，放學後繼續開工然後又返學，冇得瞓係好辛苦，我認上堂有瞌眼瞓，好彩好朋友見到我個頭跌落嚟就會叫醒我。」

雖然拍劇辛苦，但Yumi捱過後不怕再接受挑戰，有指她將於新劇《夫妻的博弈》飾演高海寧的年輕版，不過劇集在內地拍攝，她可能只有放假時可以開工。對於工作量比After Class其他成員多，她指姚焯菲和詹天文不在港，炎明熹（Gigi）又忙於應付大學功課，變相其工作量最多，而當初選擇留港讀書，也是為了保持演出機會，不覺得公司偏心，但坦言很想4人合體演出，並笑說：「當然想重聚！不過，一講起After Class呢個名我有啲唔慣，因為我部劇入面女團叫After Work。（算唔算拆咗夥？）唔係，我哋個心永遠連住，早排約去玩，Gigi都有去，證明友誼不變，有冇演出機會就交畀公司安排。」又指Gigi很關心所有《聲夢》學員。

談到其新歌《Masterpiece》跟以往的曲風相比較文靜，跳唱亦欠奉，Yumi解釋指隨着已達成跳唱目標，希望下一步向抒情歌進發，帶來新鮮感，她尤其喜歡MV中的眼鏡Look：「遲啲想唱吓抒情歌，因為我就快18歲，想試多啲嘢，最近我都有試吓作曲填詞。」並透露手上有零碎的小作品，但未敢發布，希望慢慢學習：「今時今日仲覺得係新人，保持學習嘅心。（下一個目標？）有好多幻想，好想有自己嘅演唱會。（生日禮物想開個唱？）希望公司幫吓手。」