再做「獎門人」 心情緊張 曾志偉派千萬 勾集體回憶

志偉、錢嘉樂、阮兆祥及麥美恩等昨午現身電視城，出席《開心無敵獎門人》拜神儀式。台前幕後晚上招待現場觀眾錄影首集，節目將於7月31日推出，並橫跨台慶前後播放，決心要勾起觀眾集體回憶。

約10年未有主持「獎門人」，志偉表示心情有少許緊張，至於過千萬贊助獎品紛至沓來，他打趣：「我哋多多益善、少少『有』拘！（諗住請邊個大卡士嘉賓？）暫時會請啲未玩過嘅玩咗先，會逐漸有啲舊雨亮相，睇吓邊個玩得叻，整場新知舊雨PK賽。」談到無綫劇組出現確診，志偉無奈說：「我哋係服務性行業，點都要盡做，我哋每日返嚟都要先做檢測。」

至於「七．一晚會」李克勤與周深合唱，被指原來是兩年前舊片，志偉解釋：「克勤同周深檔期好難夾，所以先決定二次創作，用舊片重新剪輯，換上新布景，再加入姚珏等演出，出嚟效果幾好。」

麥美恩「升呢」做獎老，前晚綵排遊戲時，顯露貪玩本色，她說：「我想玩『搵啖食』同『落雨擔遮』，所需用品比較簡單，小朋友都可以喺屋企玩。」除錄影獎門人外，她亦忙於拍攝賀歲劇《黃金萬両》。對於電視城有人染疫，她說：「我日夜都有做檢測，好彩我嘅劇組暫時冇事。（拍攝有乜難忘事？ ）經歷過打風同水浸，天氣好熱，係辛苦少少，但賀歲劇要keep住開心嘅情緒。」