高估身手撻落地 張敬軒扭身試腰力 搞展覽清倉

張敬軒跌傷腰部後一度不能行路，嚇怕不少歌迷。事隔幾日，他昨日出席新手機活動，大批粉絲湧至撐場打氣，軒仔即場展示腰力，向前向後拗腰都相當靈活，歌迷終可放下心頭大石。他玩扭蛋機時，抽中一個迷你手機的鎖匙扣，開玩笑說道：「農曆7月過咗，我收到喇！」認真貪玩！

他重提受傷當日正在貨倉爬高整理收藏品，聽到手機響起後一時心急，才踏空跌倒：「可能傷咗肌肉，因為我怕整親骨，就順勢扭一扭身，以為自己反應好快，當正係武打巨星！好彩照過骨冇事，復原進度OK，不過腰仲有少少痠痛。」並透露之後有個新企劃要爬上很高的地方，所以必須重新克服畏高。

軒仔直言儲物太多，正計劃與友人開設Pop-up store，將收藏的英式古董銀器、古董傢俬及王菀之送贈的1：1卡通公仔等大晒冷，朋友則會展示收藏的電單車，打算租用6,000呎的空間。他認為交換收藏很有趣，歡迎參觀人士以物易物，自言想以大換細，換回一些紙品及畫作方便收藏，笑言概念像「年輕人版救世軍」，同時可以讓市民多個打卡點，一舉兩得。