踢竇：男士禁地！唐菲擲14萬打造粉紅城堡

女子組合B.Gs成員唐菲（Toffee）現與經理人及兩隻愛犬「叉燒」和「雪雪」，租住佐敦一個約800呎單位。她坦言以前跟家人住在新界，感覺現在交通較方便。

她自爆鍾情舊樓，貪其實用面積較大，但因樓宇太舊，故在裝修上花了不少心思：「我寧願落多少少本錢裝修，全屋傢俬同牆紙裝飾用咗14萬，大部分網購返嚟後自己黐，花咗一個月時間。我讀過設計，不過一手一腳整間屋係第一次。」

全屋傢俬包括梳化椅、單座椅、化妝枱、餐枱、床單被鋪、仿古舊唱機、夜燈、窗簾，甚至連兩隻愛犬的蝸居也是粉紅色，Toffee笑言：「佢哋係女仔，梗係粉紅色啦！」又指自己有顆少女心：「經理人好就我，佢都鍾意埋粉紅色。（你想做小公主？）希望，但我要返工，亦好鍾意返工，公主都要食飯啊！未搵到王子，所以仲要黐住經理人住。」她們訂下「家規」，就是「唔可以帶男仔嚟，坐都唔得！」由於經理人有潔癖，幾乎負責所有家務，Toffee則幫手洗衫晾衫、洗碗及煲水等。