唐詩詠叨女神光 撞樣當Bonus

唐詩詠、馬德鐘、王君馨、鮑起靜及關禮傑等，昨日宣傳無綫劇集《我家無難事》，適逢古佩玲生日，大會送上蛋糕，令她開心不已。

忙於拍攝新劇《隱形戰隊》的詩詠透露，今次不乏打戲，雖然非主力與馬國明對打，但足以令她累透：「佢太高，打佢有啲驚，今次打得又密又快，最怕同女仔打，因為大力會傷到對方。記得拍《唐人街》時同伍允龍打，佢問我可唔可以細力啲！」對於被指與女神張曦雯及朱千雪撞樣，她笑說：「總之冇講係男人或動物，已經好開心！（似唔似？）唔似，女神好獨特，不過能夠似少少，已經覺得係好好嘅事。」

談到好姊妹黃翠如疑受情緒困擾，以致新劇易角，詩詠說：「人生會經歷好多唔同嘢，畀啲時間佢。（洪永城話佢狀態麻麻。）佢非常好，有好多自己嘢做，適當時候會見大家。」

至於第4集已逝世的影后鮑起靜，對於有觀眾不捨並揚言罷睇，她說：「我仲有得出現，仲要密到集集都有，唔使擔心。」飾演慈母的她，笑指現實中不及角色：「我個女好細個就去咗英國，依家掛住啲孫多過個女，上次探佢哋留咗3個月，不過疫情關係，都有年幾冇見，惟有靠視像見佢哋啦！」馬德鐘自爆拍攝鮑起靜離世一幕時強忍淚水：「忍得好辛苦，因為鮑姐好有感染力。」

而關禮傑談及女兒關楓馨在港姐決賽的表現，坦言入12強已滿意，又指女兒將簽約無綫，問會否期待父女檔合作，他說：「都想，平時聽得多父子合作，父女比較少，都想試試，演情侶都可以。」