無綫高層衞世輝猝逝志偉痛失戰友陳庭欣哭悼

效力無綫40年的「製作部非戲劇分部經理」衞世輝，昨晨因心臟病發猝逝，終年62歲。他曾參與製作多個大型綜藝節目，包括台慶、港姐等，更是由場務做到經理級，成績備受肯定，近日則正為10月的《2022無綫節目巡禮》作籌備。

入睡時心口痛送院

據知，他的心臟一直有問題，之前曾裝上心臟起搏器，前日如常上班的他，昨日原定往做身體檢查，惟無綫副總經理曾志偉昨晨收到其太太通知他的死訊。

曾志偉昨日受訪表示：「尋日5點幾仲同佢傾緊好多節目，尋晚佢太太同我講，佢瞓覺時心口痛，要Call白車入院，但去到已經過咗身，嗰陣係清晨。」他指衞世輝對無綫貢獻重大，無綫會協助負責其身後事及所有費用。而志偉昨日出席港姐活動時亦說到眼濕濕：「今次我返無綫佢最幫得我，今日我都同啲下屬開會，根本傾唔到，係咁喊。佢前一日話想約啲下屬食晏，話自己『夠咗退休年齡，公司好似我個家咁，需要我』。」

林盛斌：佢係百分百大好人

而之前跟他合作奧運節目的陳庭欣昨日受訪時哭成淚人：「我啱啱先知，好突然、好傷心，我哋喺度拍緊嘢、食緊飯，都停晒手，接受唔到！」而林盛斌直言很傷心：「佢係TVB綜藝科其中一個最好最好嘅監製，百分之百嘅大好人！咁多年嚟，佢畀咗好多好多機會我。」