唔知老友新劇被Out 洪永城爆黃翠如：冇以前咁Fit！

藝人洪永城、陳曉華（Hera）、陳楨怡（Celina）、伍樂怡、王菲及麥大力，昨日出席明珠台《香港都會大學提供：知識新天地》電視節目啟播記者會。提到洪永城婚後久未出席活動，他笑言要享受二人世界，又要忙為劇集《凶宅清潔師》做後期製作，兩星期後則開拍《法證先鋒Ⅴ》。身為準爸爸的他坦言看了很多育嬰指南：「太太應該年底生，我向《法證Ⅴ》劇組請咗兩個禮拜假。」並指太太梁諾妍現已做好生育準備：「醫生話佢好健康，只係有時會腳攰，我就幫佢按摩。（陪入產房？）未諗，但我唔怕血，扶持佢緊要過怕血！」

問到可知好友黃翠如原本有份演出《法證Ⅴ》，但最後被換角？他說：「我真係唔知，我一嚟就已經係蔡潔，即係依家嘅名單。」他坦言有慰問翠如：「佢OK嘅。（佢幾時開工？）佢暫時都係休息。（佢有冇異樣？有冇窒少咗你？）一半一半啦，好似冇以前咁Fit嘅狀態，但都有『潤』下我，所以狀態都唔錯，哈哈。」

至於Hera及Celina齊齊晒腿現身，Hera自爆上堂時會瞓覺及玩電話，至於在英國讀書的Celina表示：「因為我讀建築，所以有去field trip（實地考察），去過莫斯科、印度，試過喺零下30度每日行8公里，眼睫毛都結冰。」讀護理系的Hera表示在醫院病房實習了一年半，最難忘有小朋友因撞車致腳部碎骨：「每日經過病房都會聽到小朋友喊，我忍唔住匿埋喊。」