拍拖講交流年齡不設限李佳芯適應失戀：最壞時間已過

藝人李佳芯昨日出席劇集宣傳，提到劇集拍攝時正值失戀，她坦言當時全情投入工作，最壞時候已經過去，暫時未有計劃展開新戀情。

李佳芯、馮盈盈、麥美恩及簡淑兒等，昨午宣傳無綫劇集《智能愛人》。迎接劇集結局，問到李佳芯可有不捨？她說：「作為演員都要經歷㗎嘞，最緊要享受拍攝過程。（拍呢套劇嘅時候正值分手，感觸良多？）演員要感受生活，嗰段時間將心思放晒喺工作，扮演機械人要比較理智。（煞科先感到唔開心？）咁即使係朋友，識咗咁多年，都一定需要時間適應，依家我好OK，總之最壞嘅時間經已過咗！」

盈盈背脊識做戲

至於不時盛傳被富商追求，李佳芯說：「做朋友唔會知道對方有冇錢，但相信冇報道咁誇張，不過我暫時冇諗過再拍拖。」談到即將與馬德鐘拍喜劇，她說：「依家相信要11月先開拍。（話『聲夢』黃奕斌加入，同你發展姊弟戀？）係有個後生仔嘅角色，其他未好清楚。（現實生活中接受到年齡相距咁大嘅戀愛？）我比較注重精神交流，唔會被年齡限制。」

馮盈盈姍姍來遲，要全場人等候她，她尷尬地說：「對唔住，搞錯咗時間，加上交通需時。劇中我同陸永分手喊戲被讚，多謝導演悉心安排，淨係影我背面抽搐，大家都覺得我入戲，聽到大家嘅評語好感動。」

主持4年似讀大學

至於有份主持的《#後生仔傾吓偈》收官，她形容未有想像般不捨：「知道會轉形式拍節目，我哋唔係唔再見，唯一唔習慣嘅，應該係逢星期五錄影，以後呢日空咗出嚟有啲失落。」盈盈指過去4年主持節目，時間等同讀大學：「依家大家畢業嘞，有啲KOL仲開始拍劇。」