2度重創鬥志不滅 陳兆榮同傷患打心理戰
自從《搵球星傾吓偈》環節於「睇體ontv Sports」facebook專頁面世後，令唔少球迷對球星偶像加深互動了解！有見及此，主持人「司徒大導」決定立即加推第3輯，搵嚟雖然只得28歲，但已經歷多次人生高山低谷嘅陳兆榮同大家傾吓偈，親自回答球迷朋友問題！呢位效力東方龍獅後衞，更透露自己再度面對嚴重傷患嘅點點滴滴！
司徒大導：喺2017年十字韌帶斷裂而要「收咧」，但你喺努力下僅用10個月時間就康復，仲趕得切幫東方龍獅拎到甲一總冠軍。之後你嘅發展順風順水，但上年偏偏喺最Fit嘅時候又再重傷……點睇呢個上天畀你嘅磨練？
陳兆榮：呢個的確係一個磨練，始終傷完一次又再傷，喺心理上嘅壓力會大過身體上，但我相信可以Overcome嘅挑戰，亦都話我知日後要更留意自己身體嘅Signal，要確保身體狀況良好去比賽。
Dick Kh：驚唔驚又再重傷，會令你運動員生涯完結？
陳兆榮：當然驚啦！但作為球員落得場就冇得驚，唔係就輸一世o架。我只能夠做更多嘅準備去迎接比賽中出現嘅唔同情況，盡量避免傷患。
Hoi Ming Lo：兩次膝部受傷，會否令你從1號位轉去打2號位射手，減少衝擊籃框同身體碰撞嘅機會，減低受傷風險？現時你膝部康復情況如何，能否在今年年底復出？很多球迷等着你強勢回歸，我哋繼續支持你，兆榮加油！
陳兆榮：由1號位轉打2號位都有可能，不過都要睇教練調配。我都希望可以喺年底復出，但今次可能會用多少少時間去做Rehab，再根據情況去決定。Thank you for the supports！
發夢做評述員．蘇雞—蘇肇朗 Sochick：如果可以用一樣重要嘅嘅換取你終身打波唔會受傷，你會用乜嘢去換？
陳兆榮：可能用自己彈跳能力去換取唔受傷，可惜時光倒流係冇可能。同埋作為一名運動員，大大小小嘅傷患始終都係會有機會發生，希望自己能夠更加做好準備，了解自己嘅身體，去應付練習以及比賽。
李仲尼：喺東方入面，邊個同你最老友？喺籃球圈入面，邊個同你最老友？點解？
陳兆榮：鄧志恒、傑仔（葉俊傑）佢哋都比較老友，始終一齊由細打波打到大，又成日做隊友。而去集訓比賽更加留低咗好多深刻經歷，所以就更 Friend。
林俊光：我揀8號波衫就因為陳兆榮，你揀8號又因為乜呢？
陳兆榮：因為Kobe Bryant（高比拜仁）
蔡芳裕：1.如何走過再次ACL受傷的高山低谷？1A.你讀心理學有冇幫助到你再次克服傷患？2.幾時會拉埋天窗？3.如果康復仲有雄心挑戰CBA及NBL（中國籃球聯賽）？
陳兆榮：1.有過經驗之下，我已經知道點樣處理呢個傷患，走出呢個陰霾我覺得最主要靠自己嘅決心，不幸嘅事情發生咗，冇辦法，帷一可以控制係點樣處理，而我相信自己能夠做到。1A.心理學對我嚟講總有一點點嘅幫助，能對自己嘅了解有更深入認識。2.結婚呢個問題，我希望係不久嘅將來。3.始終經歷過兩次大傷患，加上依家28歲嘅年紀，對年輕時定下嘅目標有好大嘅影響，所以暫時先將目標放喺康復以及回到球場上。
Mars Lee：最難忘嘅比賽係邊場？有冇邊球喺你個人認為嘅金球，令你最回味o架？Thx！
陳兆榮：本地的話，當然係東方龍師拎冠軍嘅賽季，反勝3比2嘅情況實在深刻，全靠隊友們嘅付出。而復出第1場比賽，射入第一球3分，更加難忘。聽到球迷嘅歡呼聲，覺得做Rehab嘅9個月並冇白費。
Elaine Lam：讀書時期打籃球遇過最大嘅困難係乜，而你又點樣去解決呢個問題？希望可以藉着呢個問題嘅答案勉勵依家嘅學生運動員。
陳兆榮：同時去兼顧兩方面，的確困難。最難應該係時間分配，始終兩邊都需要大量時間嘅付出，沒有捷徑。所以如果有問題，可以考慮問吓前輩，或者可以節省唔少時間，更快達到目標。
Tia Tia Tia：我超鍾意你o架，覺得打籃球時候嘅你好型。想問你鍾意邊類型女仔？長頭髮定短頭髮？運動型定斯文型？
陳兆榮：多謝你嘅支持。我喜歡我女朋友嘅類型，做運動及陽光嘅類型。
Jordan Hui：兆榮球星，你覺得邊個年輕一代似係你接班人呢？
陳兆榮：唔好講到接我班咁大件事，其實好多年輕球員都好有潛力，徐遠征就係例子。
Timothy Chan：兆榮點可以練到射三分波可以又快又準？
陳兆榮：都係老套嘅答案，練習、練習、再練習。不過當然唔係盲目咁去射，要去注意細節，包括手嘅動作同身體嘅協調等，相信你喺網上都可以搵到好多片去學習，你亦都可以搵一個球員去模仿。
葉俊傑：點樣可以好似你咁靚仔
陳兆榮：但我都係唔夠葉師傅你靚仔，又高大威猛，英俊瀟灑，風流倜儻……（下刪500字）
蘇志樂：點解唔去做模特兒呢？！
陳兆榮：因為唔夠你靚仔同有型，被迫放棄。
Matthew Lee Edwards：你對未來香港籃壇同港隊有乜願景？
陳兆榮：1.有一個更完善、更高水平、更多比賽次數嘅平台畀香港籃球員去發揮。2.希望球員發揮同比賽刺激度相輔相成，從而吸引更多觀眾入場支持。3.再者希望香港有大型專用場館去舉辦本地籃球賽事，更甚承接國際比賽，令球迷或球員能夠親身接觸到國際水平賽事。而閒時就用作培訓青少年籃球之用，令更多新星得以誕生。4.本地籃球聯賽能發展成熟，吸引更多投資者發展籃球，令球員能維持生計，養活自己和家庭，不用日頭一份工，夜晚一份工。5. 職業籃球員能成為小朋友係香港嘅理想職業，而不單止是興趣。6. 港隊能多參與東南亞地區嘅賽事，慢慢提升水平。