球壇浪人迪布利睇化晒
「被蛇咬過，又點會懼怕地上奈你唔何嘅蚯蚓？」迪布利用流利的法文吐出這句諺語，為自己職業生涯遇上的艱辛作概括。職業足球不是必然這道理，對效力富力R&F的這位球壇浪人而言絕不陌生，四處漂泊的經歷，令他內心更強大，亦讓他能淡然面對眼前疫情肆虐下的難處。
2010年「土倫盃」獲得當屆最佳球員獎的迪布利，帶領科特迪瓦封王，引起各方關注，惟其職業生涯並未因此變得平坦：「當時我同查爾頓簽咗約，卻因工作簽證問題冇得為球隊上陣，惟有先後被借到法國昂熱同南特。」迪布利很快就厭倦這種「人球之旅」：「作為外借球員，我好難喺法國攞到穩定上陣機會，之後重返查爾頓連比賽都冇得踢，當時雖然有其他球隊想要我，但因轉會費問題一直傾唔掂數，結果蹉跎咗好耐。最後我覺得受夠了，決定告上國際足協尋求仲裁。」
球場政治影響落場機會
最終迪布利雖如願離開查爾頓，但官司令他在歐洲球壇留下「麻煩友」的印象，導致幾乎無人問津：「當時冇波踢真係好困難，如果唔係球場外嘅政治，我會有更多機會。」天無絕人之路，迪布利繼後轉到俄羅斯、丹麥、甚至更冷門的阿美尼亞聯賽效力，其後機緣巧合下，獲遠赴中國和香港發展的機會，雖然被貼上「掘金」標籤，但迪布利已「睇化晒」：「好似C朗咁名利雙收嘅球員，又有幾多個？喺俄羅斯踢波時我諗通咗，球員職業生涯咁短，犧牲咁多，有機會一定要搵返夠本！」
為掛靴着想投資「磚頭」
再輝煌的日子，總會有完結一天，過往經歷讓迪布利明白到職業足球的無常。不少香港人忙碌大半生，就是希望能有安逸的退休生活，如何「慳啲使」為未來打算，也成為迪布利面對的課題：「我見過以往喺球場上踢到曉飛嘅球員，退休後潦倒不堪，甚至要四圍敲門求助，我唔想自己係咁。我喺科特迪瓦同法國都有投資房產，希望掛靴後可以靠收租過活，並一直警惕身邊嘅年輕球員，要好好看管自己嘅收入支出。」
文：林卓臻