NBA昨日常規賽一場「海軍鬥水兵」嘅下游賽事，竟然成為聯盟史上其中一場經典！東岸兩支「擺爛」球隊鷹隊同公牛，合演馬拉松式「4加時大戰」，最終公牛作客以168比161擊敗鷹隊，而今場合共攻入329分，成為NBA史上第3高得分賽事，莫講話落場打，真係睇波都睇到攰呀！
NBA史上最長嘅賽事係6次加時，今場就係歷史第15場4度加時或以上賽事，而對上一次出現4加時比賽咁啱又係鷹隊（2017年1月），當時佢哋以142比139擊敗紐約人。不過，今次公牛同鷹隊合共入咗329分就係史上第3高得分比賽，僅次於1983年活塞對金塊（370分），以及1982年公鹿對馬刺（337分），認真夠癲。