安永佳：要踢入美職

「安仔」於省港盃這個大場面表現毫不怯場，球迷絕對有目共睹，一直努力向職業足球方向發展的他，除了於美國就讀大學之外，亦一直活躍於當地大學足球聯賽，放假期間更會回港於傑志青年軍跟操，對比兩地足球風格，就連以體能見稱、身高1米88的「安仔」都直言前者對抗性太強：「技術方面，我覺得唔少香港球員都唔輸蝕，不過美國大學聯賽對抗性明顯更強，對體能要求亦更大，有時訓練唔出盡十成力，教練就唔會畀你上場比賽，競爭十分激烈。」

過去多年為三藩市大學效力的「安仔」，畢業後想開始職業足球生涯，回流香港或許是不錯的選擇，不過來到大學最後一年，他卻毅然決定遠赴美國東岸轉投錫拉丘茲大學，原因好簡單，就是進一步挑戰美職：「錫拉丘茲大學係大學足球聯賽勁旅，過往唔少舊生都被美職球隊相中，因此我想喺大學最後一年博吓，睇吓可唔可以喺呢支強隊站穩陣腳，希望有朝一日成為被選中踢美職嘅香港細路。」

難忘「第12人」嗌爆大球場

以年輕球員為主的港隊，省港盃賽前因經驗欠奉被看低，不過 「安仔」次回合在大球場主場球迷面前，接應罰球頭槌破網為港隊攻入第一球，最終帶領球隊捧盃，令不少球迷對他留下深刻印象，原來對「安仔」而言，這次主場作賽經驗對他來說頗為新鮮：「其實以前一直有為香港各級梯隊踢比賽，不過大部分都係作客賽事，好少會有球迷撐，好似省港盃有咁多港隊球迷入場支持，對我嚟講真係第一次，球迷嘅吶喊聲就好似自己隊波多咗第12名球員一樣，令我表現有好大提升。就算最後我被紅牌驅逐，離開球場嗰陣，我依然聽到香港球迷呼喊我個名，嗰一刻真係好感動。」

安永佳

年齡：22歲 身高：1米88
位置：左後衞
現效力球隊：錫拉丘茲大學

文：林卓臻