魯域斯基韋迪搶鏡過MVP

兩大傳奇威過MVP!NBA明星賽昨晨喺黃蜂主場圓滿結束,勒邦占士隊以178比164反勝安迪杜甘普隊,而「占士隊」嘅杜蘭特就當選MVP。不過今場嘅焦點反而係「閃電俠」韋迪同「德國槍」魯域斯基,呢兩大傳奇名將以「嘉賓」身份對陣,喺第4節開始前,仲喺一大班球星拱照下,進行告別儀式,場面勁感人!

近年明星賽大玩「零防守」,入波雖多但唔少球迷就呻悶,嚟到今屆就有新嘢睇,適逢兩位傳奇球星韋迪同魯域斯基宣布今季尾退役,賽會就邀請佢哋做嘉賓落場。第13次出席明星賽嘅「閃電俠」今場打咗10分鐘,4投2中攞到7分4助攻,其中佢同老拍檔勒邦占士嘅「拆你屋」贏盡球迷掌聲,至於第14次打明星賽嘅魯域斯基則只上陣4分鐘,但三分波3投3中,超高效認真犀利。同時,喺第4節開始前,仲有一個告別儀式,向呢兩位球星送上特別版波衫作致敬,魯域斯基話:「多謝總裁同NBA畀機會我哋再次踏上呢個舞台。」韋迪則補充:「完全係Dirk(魯域斯基)所講一樣,我哋好感激有呢個機會,明星賽真係冇得彈,依家離開係最好時機。」

「希臘怪獸拆你屋」勁癲

講番場波,雖然「大帝」占士有19分、8籃板,仲有舊隊友艾榮合作攞分,但論表現都未及杜蘭特,佢拎31分,帶領占士隊反勝,獲選MVP實至名歸。另邊廂,首次出任隊長嘅「字母哥」安迪杜甘普亦都好識搶鏡,頻頻入樽豪取38分,其中接應「咖喱仔」史堤芬居里超大力彈地波,跳到幾乎頭頂籃框嘅「希臘怪獸拆你屋」令人拍案叫絕,雖然輸波,但可算係省靚招牌。