上周五一場阿甲聯賽羅沙里奧中央對河床，比賽中途一名滿身彩繪嘅女子半裸衝入球場，話要傳揚「反暴力訊息」，搞到入場球迷有「意外收穫」。比賽踢到下半場8分鐘左右，任職健身教練嘅29歲女子施娜絲坦洛莉，忽然除咗外衣衝落草地四圍走，在場雙方球員梗係停晒動作睇下乜料，警察呢個時候焗住出嚟捉人，但身手嬌捷嘅施娜避開重重圍困，最終要5個人圍捕先截得住佢。
身上塗有羅沙里奧中央、紐維爾舊生、小保加同河床隊色嘅施娜，話自己只係想呼籲大家反球場暴力，結果「以身作則」宣揚和平理念。由於只係干擾球賽，並唔係乜嘢重罪，所以施娜好快就獲執法部門釋放，但就罰佢以後唔可以入場睇波。呢位羅沙里奧擁躉就咁講：「佢哋禁止我再進入球場，但係我都冇考慮再去！」咁即係表示大家未必再有機會喺球場欣賞到佢嘅「表演」嘞。