林書豪過檔速龍

NBA美籍華裔球員林書豪正式買斷自己同鷹隊嘅合約，將會以自由身加盟速龍。林書豪喺社交網發文，多謝鷹隊過去兩年畀機會佢，特別係受傷之後，幫助佢重返球場。據悉，林書豪買斷合約之後，最快可於日內加盟速龍，亦會係佢近6年第6支效力嘅球隊。至於速龍喺尋日早上嘅賽事，就以127比125擊敗籃網。

尋日早上另一場NBA賽事，火箭以120比104擊敗獨行俠，火箭球星占士夏登取得31分、8個籃板、7次助攻，亦係佢連續30場得分「30+」，只要下場再攞30分，就可以追平名宿張伯倫，成為NBA史上第2最長連續得分「30+」嘅球員。

占士夏登上場比賽整傷肩膀，第一節表現明顯失準，5次外圍投射都唔中。不過佢之後愈戰愈勇，其中最後52秒，超遠位置射入三分波，令全場起身鼓掌，大叫MVP，因為占士夏登射入呢球，得以連續30場得分「30+」。