日本泳壇最佳泳手池江璃花子，對外宣布患上血癌。呢名18歲女泳手，於去年雅加達亞運勇奪6金2銀，被選為賽事最佳運動員，係日本於2020奧運會嘅奪金希望，但就好事多磨不幸患上惡疾。池江璃花子外貌甜美、酷似日本靚女明星廣末涼子，被當地傳媒封為「水上之廣末」，現時佢已暫停所有訓練專心養病，希望復出時係「更強嘅池江璃花子」。
本月初池江璃花子到澳洲訓練時突感不適，隨即回國檢查，不幸確診血癌，昨日佢喺社交網公布有關消息：「覺得唔舒服後，就即刻離開澳洲返日本，檢查之後確診係白血病（血癌）。我覺得難以置信，依家仲未接受到，但呢種病係可以治愈嘅。」因為患病，池江璃花子決定暫停訓練，並唔會參加今年喺南韓舉行嘅世錦賽，佢能否趕及2020東京奧運為日本爭光，仍屬未知之數。
池江璃花子被封為近代日本最強泳手，於2000年7月出生於東京都，身高1米70。佢於亞洲泳壇可以話係超晒班，係12種個人同9項接力項目嘅日本紀錄保持者，2016年已代表國家參加里約奧運，到2018年雅加達亞運，更勇奪6金，當中包括於50米自由泳決賽，擊敗項目亞洲紀錄保持者、中國大美女劉湘奪金，戰鬥力非同小可。