和富大埔VS佳聯元朗升級版新界打吡
今午另一場重頭戲，由和富大埔主場迎戰佳聯元朗合演「新界打吡」。「綠軍」正值4連勝，但主帥李志堅提醒球員切勿掉以輕心，另邊廂元朗雖近6仗不勝，惟主教練郭嘉諾盼在王睿及張健峰加盟後，改善防守，並在繼在首循環後合演4比4入球騷後，再次於對手身上搶分。
今輪為聯賽次循環第1場賽事，和富大埔目前以16分排第4，落後榜首富力R&F只有3分，儘管今仗對手佳聯元朗近況下滑，但主教練李志堅卻認為不容忽視︰「元朗今季目標較為清晰，又冇乜枷鎖，可以打得比較放，所以我諗任何球隊都有可能喺佢哋身上失分！上場元朗對飛馬我都有入場睇，佢哋球員好拚搏，去到最後先至失波，所以我覺得呢支球隊都相當難應付。」
「堅Sir」透露，由於利馬未能在下周的銀牌賽決賽上陣，今仗會讓他獲得更多的落場時間，另外艾華度及杜度都有傷，需有待觀察最新狀況才能決定可否披甲。
郭嘉諾盼改善防守撼強敵
至於佳聯元朗自10月下旬擊敗夢想FC後，球隊於各項賽事6戰不勝，來到次循環，主教練郭嘉諾認為球隊要改善防守：「我哋上半季失波多，要喺防守上再做好啲，呢個亦係點解我搵王睿同張健峰嘅原因。」對於今仗面對4連勝的大埔，「郭Sir」揚言：「壓力喺對手身上，因為佢哋要爭取冠軍，所以每一場波都不容有失，我哋依然會保持『唔驚輸』嘅心態去踢！」元朗目前有王睿、羅振庭受輕傷，預料可趕及上陣。