畀NFL搶晒FO 普帥督師睇埋一份
尋日NBA常規賽，馬刺作客112比122不敵雷霆，兩隊日前先至打咗場大手交易，馬刺雙加時下贏154比147，兩隊總分夾埋超過300分，成為本季經典賽事。但今場前來採訪嘅記者都心不在焉，原來同時間有場NFL美式足球大戰，搞到個個掛住睇波，馬刺主教練普波維治睇到都玩埋一份，叫其他人咪阻住佢睇波添！
馬刺作客畀「雷」劈
NFL依家進行緊季後賽，NBA期間同時間舉行NFL洛杉磯公羊對達拉斯牛仔嘅大戰，令到傳媒對今場比賽冇晒興趣，就算兩軍上場合演咗場經典得分Show，始終只屬常規賽階段，所以一個二個都去晒更衣室睇NFL直播。馬刺老牌教頭普波維治睇到呢個情況，先責備記者「偷懶」，前嚟採訪NBA但又掛住睇NFL，之後佢搞笑咁講：「我都睇緊波呀，你哋唔好騷擾我！」
講番今仗，韋斯布克得24分、10個籃板及7次助攻，保羅佐治亦交出18分及11個籃板，協助雷霆贏波結束3連敗；馬刺方面迪羅辛及艾迪列治夾埋獲35分。同日另一場木狼主場110比106贏塘鵝亦甚有睇頭，主隊唐斯取得生涯紀錄27分27個籃板、3助攻2次偷波4次封阻，亦係本季NBA紀錄。