香港飛馬佳聯元朗拗手瓜
今日港超聯尾場由香港飛馬於主場旺角大球場對陣佳聯元朗，雙方今季火力十足並於冬季轉會窗積極增兵，主隊簽入中場大衞拉菲爾以增強側擊，客軍則簽入王睿和張健峰，雙方實力大有提升，今仗定必有一番惡鬥！（周日下午5時30分開賽）
大衞拉菲爾帶起成隊
今仗面對今季表現驚喜的佳聯元朗，香港飛馬主教練陳浩然認為要在鬥志上取勝：「元朗今季表現唔錯，士氣、鬥志好好，佢哋加咗球員唔係我最擔心嘅事，反而士氣、鬥志係佢哋嘅本錢，所以我哋喺呢方面要做得比佢哋好！」「陳Sir」又大讚新援大衞拉菲爾：「佢練習態度好好，帶動到練習氣氛，本身又係好勤力嘅球員，好多走動，相信佢落場配合唔會太困難，反而係要搵一個最適合嘅位置畀佢發揮。」此外，飛馬早前亦向東方龍獅借用中堅曾至孝以增強後防調動。
佳聯元朗相隔約兩周再比賽，為保持球員狀態，主教練郭嘉諾表示：「我哋周中約戰愉園，希望攞番比賽感覺同埋熟悉吓有王睿、張健峰嘅陣式，都收到效果。兩位新球員都融入到球隊，張健峰幫到一班年輕球員，至於王睿都熟悉香港訓練環境，佢態度一流，希望呢兩人可以加強後場組織能力。」