2019年澳網將於下月14日開打，1月27日上演男單決賽。眾所周知墨爾本地處南半球，1月正值盛夏酷暑，氣溫飆升到攝氏40度甚至以上並唔罕見，澳洲氣象局近日更發布最高等級嘅「極端熱浪」警報，預測未來3日悉尼內陸郊區，將出現40度高溫，下月中澳網舉行時，估計球手會一如往年，要應付燒到燙腳嘅惡劣環境。
指數爆錶露天比賽將暫停
賽會今年同悉尼大學合作制訂出酷熱指數，根據氣溫、熱輻射、濕度同風速幾方面計算得出，以5為最高。如果指數接近極限，男單嘅第3及第4盤之間就會休息10分鐘。假如指數達到或超過5，所有露天球場比賽將暫停，墨爾本體育公園內嘅有蓋球場亦會關閉上蓋。