羅斯聯盟最感動人物

木狼加時畀「鷹」啄

戴歷羅斯開波冇耐已經完成招牌剷籃，跟住佢手感保持火熱，到第4節射入3分協助木狼一度領先9分，完場前又飛出場外救波，認真搏命，可惜佢喺第4節結束前突破唔成功，最後傳球失誤錯過絕殺機會，進入加時後仲因氣力不繼被迫坐低，唔能夠幫木狼贏波。

不過羅斯今季喺公牛時代嘅恩師泰保杜指導下，已經搵番失去嘅尊嚴。雖然佢喺重傷後仲未做到MVP時代嘅屈機突破，但外投已經有明顯進步，今季3分命中率達45.5%，而且平均每場獲18.7分、2.8個籃板同4.7次助攻，絕對對得住自己兼所有球迷喇。

AD超癲表現擒獨行俠

羅斯今場埋單有25分、3個籃板同9次助攻，日前木狼作客以119比94擊敗公牛，羅斯重返芝加哥倒戈交出24分，搞到公牛球迷大嗌MVP，賽後有粉絲整咗張30歲嘅羅斯拉起21歲羅斯改圖，意思係只有自己可以扶番起自己，型到爆裂亦幾乎令所有NBA球迷感動流淚。

同日獨行俠作客以112比114，僅僅兩分之差不敵塘鵝，選秀探花當錫保持生猛獨取34分，包括三分球10投7中，創出加盟獨行俠以來得分新高，仲以19歲303日之齡，成為聯盟史上單場射入7個三分球嘅最年輕球員，不過塘鵝主將安東尼戴維斯（AD）仲癲，錄得48分及17個籃板嘅超驚人數字，協助塘鵝結束5連敗。