佳聯元朗富力R&F搶食尾胡
今日菁英盃A組於旺角大球場演獨腳戲，由佳聯元朗火併富力R&F。「橙衫軍」主教練郭嘉諾表示為尊重賽事原意，將派出多於兩名U22球員上陣；富力主帥楊正光稱球隊雖在銀牌出局，今仗依舊會作出輪換，兩軍同求搶得本年度「尾胡」！（周日下午5時30分開賽）
郭嘉諾尊重原意多用小將
佳聯元朗近3周沒有正式賽事，郭嘉諾坦言擔心球隊狀態︰「12月初嗰兩場波都睇到球員狀態不足，我諗如果冇去集訓的話，情況會更差，但其實嚟緊1、2月都好多波踢。」「郭Sir」表示隊中年輕小將雖缺乏經驗，今仗仍希望派出較多U22球員落場︰「我哋係注重青訓，所以會落多過兩個U22球員，始終佢哋值得有機會。當中前鋒李靄軒好有能力，希望佢經過今場波後，攞多啲信心，喺聯賽出多啲。」至於早前公布新加盟的中華台北中堅王睿，因工作證尚未辦妥，要待下仗聯賽作客香港飛馬才能上陣。
上仗於銀牌不敵和富大埔的富力R&F，主教練楊正光表示滿意整體表現，並認為賽果未能反映比賽過程︰「上場喺『樂仔』（陳俊樂）被逐離場後，其實大家都肯走多步，顯示係有拚勁同鬥心，奈何咁早踢少個點都係難踢。」今仗雖有陳俊樂及白鶴停賽，「光Sir」認為影響不大，會依照上場菁英盃安排，給較少上陣的球員落場機會。
何彥霆報道