南下學法一踢10年 黃洋重生多得李小龍
「籃球之神」米高佐敦說過，不斷失敗是其成功的原因。加盟傑志後足球事業看似一帆風順的黃洋，也經歷過不少挫折，不過，他10年前來港在理工大學讀書及踢球的一個決定，便重燃自己對足球的熱情，亦全靠李小龍「人生如水」的哲學思想，學會在不同環境生存。
出身於上海申花青年軍的黃洋，曾先後獲保送到巴西及葡萄牙等地學法，惟始終未能取得升上一隊的機會 ，一度令他產生放棄足球事業的念頭， 不過一次以上海東華大學舊生身份跟理工大學進行的友賽，間接令他獲得後者提供獎學金來港讀書及踢球的機會，畢業後更獲得傑志垂青。
黃洋坦言：「當時收到Offer（入學條件）嘅，唔止我一個，有兩三個隊友都收到，但佢哋好理性，覺得就算過咗去香港都唔保證畢到業，可能冇收入，亦要離開屋企人。咁點解要過去？因為我個心話畀我知，想改變當下嘅生活，你一定要行出嗰一步，結果嗰一步一行就行咗10年。」
初加盟傑志冇自信受挫
或許不少球迷對「黃洋大哥」最深刻的印象，是加盟首仗便於英超挑戰盃對車路士有不俗表現，加盟傑志首季便協助球隊勇奪「三冠王」，之後一季更勇奪香港足球先生，但其實他加盟球隊初期，亦面對過不少困難。
黃洋說︰「初初喺傑志冇乜自信，踢完對車路士場波，好似畀香港嘅球迷睇到，呢個19號嘅球員都幾好波喎！但我就喺嗰年嘅季前備戰遇到好大嘅問題，因為我喺學界踢波一向比較自我，嚟到傑志初時唔係好夾，季初頭幾場坐後備席。不過自己想進步唔想放棄，慶幸當時嘅隊友幫我融入傑志。我一開始踢進攻中場，點知當時高文身體唔舒服，就畀我打防中，就係把握到呢次機會，成功搵到自己踢波嘅定位，喺傑志踢到依家。」
「做人要似水適應力強」
年屆35歲，依然站穩傑志及香港隊常規正選的黃洋，原來深受李小龍一句源自《孫子兵法》的話影響：「佢話做人要好似水一樣，放入碗就成為碗嘅形狀，放入杯就成為杯嘅形狀。我都有話畀自己聽，要好似水咁適應唔同嘅環境。你可以好平穩，但都可以將自己嘅鬥志爆發，衝出舒適嘅環境，去爭一啲嘢返嚟。」水無常形，因時制宜，因敵制勝，就是這個道理。
圖/文：何彥霆